தட்டு தடுமாறி நடந்து தவழ்ந்து விழுந்து எழுந்த பயிற்சியறை என் தாய் வீடு
உல்லாசமாய் சுற்றி திரிந்து விரும்பியதை எல்லாம் விரும்பிய நேரம் உண்ணும் உணவகம் என் தாய் வீடு
சுதந்திரமாக நடமாடி வேண்டியதை எல்லாம் கேட்டு உரிமையுடன் உத்தரவிடும் ஆட்சிபீடம் என் தாய் வீடு
செல்லச் சண்டைகளோடும் வம்பு சண்டைகளோடும் சகோதரங்களோடு கூடி கும்மாளமடிக்கும் மைதானம் என் தாய் வீடு
போட்டியின்றி பொறாமையின்றி சீண்டலும் சிரிப்பும் அன்பும் அக்கறையும் நிறைந்த பூஞ்சோலை என் தாய் வீடு
நீ தந்த சுதந்திரம் நீ தந்த பாதுகாப்பு நீ தந்த அன்பு நீ தந்த அரவணைப்பு இனி எங்குமே கிடைக்காத விலைமதிப்பற்ற விடயங்கள்
உரிமையுடன் விருந்தினரை வரவேற்றேன் அன்று நானே இன்று விருந்தினராகி விட்டேன் என எண்ணும் போது விழியோரம் நீர் வழிகிறது
புது உறவுகள் பெற்ற போதும் தாயவள் பாசமும் தந்தையவர் புன்சிரிப்பும் தங்கையின் ரோஷமும் தம்பிகளின் சேட்டைகளும் நினைவுகளில் வந்து போகாத நாள் இல்லை
சுற்றி வர எத்தனை பேர் இருந்தாலும் தனிமையை உணர்கிறேன் சற்றே தலை வலித்தாலும் உன்னிடத்தில் ஓடி வர தவிக்கிறேன்
தாய் வீடே உனக்காக கவிவடிக்கையில் உதிர்ந்த கண்ணீர் துளிகளை எழுதுகோல் உரைக்கும்
உன்னோடு நான் உறவாடிய அந்த உயிரோட்டமான பொழுதுகள் திரும்பவும் வராதா என ஏங்குகிறேன்
காலத்தின் கட்டாயம் கல்யாணம் சட்டென்று மாறிவிடுமா வஞ்சி மனம்
இருக்கும் போது தெரிவதில்லை ஒன்றின் அருமை இழக்கும் போது தெரிகிறது அதன் மகிமை
வேரோடு பிடுங்கி வேறிடத்தில் நட்டாலும் விதையாக விழுந்து விருட்சமாக வளர்ந்த இடத்தை மறக்க மாட்டாள் பெண்!
கருத்துகள்
கருத்துரையிடுக